Ginpalubong na lamang ang mga nasapwan nga bangkay matapos ang paglaslas sang Bagyo TINO apisar nga wala pa ma-identify sang pamilya.
Sa interview sang Bombo Radyo Bacolod kay Negros Occidental 5th District Representative Atty Dino Yulo, tuman pa kadamo sang missing partikular na sa kinto distrito kag nagakahangawa ini nga mahimo pa madugangan.
Suno diri, gikan sa babaw nga bahin sang Bulkan Kanlaon ang tubig kag ini ang nagpanaog sa mga suba sa Brgy Sag-ang, La Castellana kag Brgy Quintin Remo, Moises Padilla area.
Bangod sa volume sang tubig, ini ang nag-overflow kag nagtuga sang mga pagbaha nga nagpanaog naman sa banwa sang Isabela kag Hinigaran tubtob nga naggwa sa banwa sang Binalbagan.
Maybahin naman sang Himamaylan City nga konektado sa Brgy Payao, Binalbagan nga nanubuan ukon low lying area gani sila ang apektado man sang baha.
Suno kay Yulo, bangod pila ka adlaw na ang nakaligad, sila ang nagapatigayon na sa karun sang search and retrieval operation.
Suno kay Yulo kalabanan sa mga biktima ang nalumos kag madamo ang nagapuyo sa kilid sang suba partikular na sa banwa sang La Castellana.
Aminado ini nga mahimo may mga biktima nga natampukan, gani panawagan sang kongresista nga kun makapanimaho sang naga-usbong nga baho, magreport gilayon sa mga local government units ukon disaster risk reduction and management offices agud ini ang mapadulungan.
Pahayag sang kongresista nga madasig madecompose ang mga bangkay, gani apisar wala pa naclaim sang pamilya ini ang ila na lamang ginpalubong, agud mahatagan man sang kapahuwayan.
Pasalig sini nga sila ang nagkuha na lamang sang documentations kag nagbilin sang buhok nga magamit inkaso may-ara sang magrequest sang DNA testing.
Suno kay Yulo, may mga narecover man sila nga gikan sa iban nga lugar, kaangay sang bangkay sa banwa sang Moises Padilla nga natumod nga pumuluyo sang Canlaon City, Negros Oriental, kag may nasapwan man sa La Castellana nga residente naman sa La Carlota City, gani mabudlay ang pagkilala sang iban nga mga bangkay.
Suno kay Yulo, nagpauli na ang kadam-an sa mga evacuees gani ang probinsya ang nagapanawagan na lamang sang bulig para sa post-disaster recovery.
