Nagpatigayon sang meeting ang Negros Island Region (NIR) Regional Development Council (RDC) para sa strategic planning para sa pagsanyog sang bag-o lamang gintukod nga rehiyon.
Ang meeting ginpangunahan ni Negros Oriental Governor Manuel Sagarbarria kag yara man sanday Negros Occidental Governor Bong Lacson nga amo ang chairperson sang Economic Development Committee; Siquijor Governor Jake Vincent Villa; Negros Oriental 3rd District Representative Janice Degamo; RDC–NIR Vice Chairperson Engr. Arecio Casing, Jr.; kag RDC–NIR Secretary EnP Marlon Jinon.
Suno kay Sagarbarria, naesturyahan ang pagkumpirmar sang Executive Committee resolutions, sectoral committee reports, kag mga programa para sa tuig 2026.
Suno diri, madamo sang gin-endorse nga proyekto kag ginalauman ini nga mapasar ang tanan sa national office.
Pahayag sini, kalabanan sa mga proyekto yara sa probinsya sang Negros Occidental sa pagpaimprubar sang mga ospital, imprastraktura, farm to market roads kag turismo.
Apang, sa karun nagalaom si Sagarbarria nga sa masunod nga tuig mabalanse ang mga proyekto para madamo pa gid nga proyekto ang mapatukod sa Negros Oriental.
