Ginpirmahan na ni Bacolod City Mayor Greg Gasataya ang Executive Order No. 15, Series of 2026 nga nagapatuman sang apat ka adlaw nga workweek sa Bacolod City.
Ini ang pagsunod sa direktiba sang national government para sa pagtipid sang enerhiya.
Nahibaluan nga base sa Memorandum Circular No. 114 nga ginpagwa ni President Ferdinand “Bongbong” Marcos Jr. sang Marso 6, ginmanduan ang mga ahensya sang gobyerno nga magpatuman sang mga pamaagi para sa energy conservation, kalakip na ang temporaryo nga four-day workweek.
Sa bag-o nga patakaran, ang mga empleyado sang city government ang magatrabaho Lunes tubtob Huwebes, alas-8:00 sang aga tubtob alas-7:00 sang gab-i, nga magsugod sa Marso 16.
Suno sa city government, ini nga compressed schedule magatuman gihapon sa ginahanglan nga 40 ka oras nga trabaho kada semana.
Suno kay Gasataya, ini nga tikang ang makabulig indi lang sa pagtipid sang enerhiya kundi pati sa mga empleyado sang syudad.
Suno sa alkalde paagi sa bag-o nga working arrangement mabuligan ang mga empleyado sa Bacolod City kag ang ciudad ang makakinot sa gatong, kuryente kag iban pa nga resources.
Dugang pa sang alkalde nga ang mga department heads magahimo sang weekly monitoring sang performance sang ila mga empleyado, samtang ang Biyernes gamiton para sa pag-review kag pag-assess sang mga trabaho nga nahimo sa sulod sang semana.
Gin-athag man nga indi sakop sang 4 day workweek arrangement ang mga nagatrabaho City Health Office, City Disaster Risk Reduction and Management Office, Department of Social Services and Development, City Engineer’s Office, Bacolod Environment and Natural Resources Office, General Services Office kag Public Order and Safety Office.
