Ginklaro sang tagpamaba sang Police Regional Office – Negros Island Region nga si Police Major Edgar Tonico, ang head sang Criminal Investigation and Detection Group (CIDG) – Bacolod City nga ginatudlo protektor sang illegal cigarettes manufacturing sa Bago City kag illegal e-sabong operation sa Talisay City, Negros Occidental ang ginpaidalom sa restrictive custody.
Sa interview sang Bombo Radyo Bacolod kay PRO-NIR Spokesperson Police Lt Col Joem Malong, si Tonico ang napaidalom sa restrictive custody sa CIDG Headquarters bilang kabahin sang administrative procedure.
Suno diri, ang CIDG Headquarters amo ang nagpanguna sa ginpatigayon nga raid sa nagaserbe nga factory sang peke nga sigarilyo sa Brgy Calumangan, Bago City; warehouse sang illegal cigarettes sa Brgy Singcang-Airport, Bacolod City; kag illegal e-sabong operation sa Brgy Concepcion, Talisay City.
Samtang ang PRO-NIR ang nagbulig man sa intelligence gathering kag monitorig, kasubong man sa security sang ginpatigayon ang raid.
Sa pihak nga bahin, bangod sa kakulang sang jail facility sang CIDG-NIR, ang mga naaresto gikan sa illegal cigarette factory, kalakip ang pila ka Chinese nationals, ang temporaryo nga ginhunong sa Bago City Police Station.
Ang CIDG naman amo ang nagfile sang kaso sa mga naaresto.
