Segi-segi na ang pagpanakod sang mga green barriers sa mga mayor nga dalanon sa ciudad sang Bacolod.
Sa interview sang Bombo Radyo Bacolod kay Bacolod City Administrator Atty Mark Steven Mayo, ginprayoridad nila ang mga dalan kun sa diin masami may mabug-at nga trapiko.
Ang green barriers amo ang concrete barriers nga ginahamtang sa center lane sang dalan, kag ini ang may tanom sa ibabaw.
Suno kay Mayo, masobra P2 million ang budget sa pagbakal sang mga green barriers, kag sila ang mga natumod nga mga focus areas nga una nga butangan.
Ang Bacolod Traffic and Transport Management Department amo ang nagatakod, ang Bacolod Environment and Natural Resources Office naman ang magatanom sang mga magagmay nga tanom, samtang ang Bacolod City Engineer’s Office ang magamintinar sa tanom.
Ornamental plants lamang ang ginabutang agud indi makatuga sang obstruction kag makita gihapon ang pihak nga lane.
Kalakip sa gin-una amo ang Burgos-Lopez Jaena Street kag bahin sang Circumferential Road.
May barriers naman sa lugar sadto, apang ini kun kaisa ang nagakatumba ukon nagakapalid, gani gin-islan sang concrete barrier.
Aminado si Mayo nga ang masami rasun sang mabug-at nga traffic amo ang pag u-turn kag left turn sa mga wala ginapahanugutan nga lugar, kasubong man ang pagtabok sang mga pedestrian sa indi pedestian crossing.
Pinaagi sa concrete barriers, ginalauman nga mabuhinan ang kabug-aton sang trapiko, kasubong man mabuhinan ang kaso sang nagakabungguan nga nagalabay sa dalan.
Pasalig ni Mayo nga may-ara pa sila sang mga concrete barriers nga mabutang sa iban pa nga mga lugar nga may problema sa trapiko.
