Patay ang isa ka drug personality matapos ginpaarakan sang luthang samtang nagahampang sang scatter sa computer shop sa Prk San Jose 2, Brgy Sum-ag, Bacolod City ala-1:27 kahapon sang kaagahon.
Ang biktima ang ginkilala nga si Edilberto Gelisanga alyas Butsoy, 43 anyos, single, wala sang trabaho, residente sang Prk San Miguel, Brgy Sum-ag, Bacolod City.
Sa interview sang Bombo Radyo Bacolod kay Police Captain Andy Ofalia, station commander sang Bacolod Police Station 9, ang biktima ang nagapungko lamang sa computer shop sang Rachel Store, sang ini ang hinali nga ginpaarakan sang luthang sang suspect.
Gilayon naman nga nagpalagyo ang suspect, apang ginatumod pa kun ini ang may kaupod nga driver ukon siya lamang ang nagadala sang scooter type nga motorsiklo sa pagpalagyo.
Nadala pa sa Bacolod South General Hospital si Gelisanga, apang ini ang ginbawian sang kabuhi alas-2:20 sang kaagahon bangod sa madamo nga igo sang bala sa lawas.
Suno kay Ofalia, ang biktima ang may mga record nga kaso, kag ini ang yara man sa listahan sang Barangay Anti-Drug Abuse Council (BADAC).
Narecover sa crime scene ang pito ka basiyo sang cal 45, kag apat ka slug.
May CCTV naman sila nga nakuha, apang ini ang padayun pa nga ginatun-an.
