Patay ang 37 anyos nga lalaki matapos ginluthang patay sa Prk. Mabinuligon, Bangga Aning, Brgy. Pahanocoy, Bacolod City alas-12:10 kaina sang kaagahon.
Ang biktima ang ginkilala nga si Alyas Boyboy ukon Gurama, wala sang trabaho, kag residente sa Prk Maghinirupay, nga kaingod lamang nga Barangay.
Sa interview sang Bombo Radyo Bacolod kay Police Captain Patrick Pol Lacandula, officer in charge sang Bacolod Police Station 8, ang biktima ang indi masami maggwa sa ila balay, apang kagab-i siya ang nagpadulong sa tyangge para kuntani magcash-out sa e-wallet.
Apang bangod sa hinali nga pag-ulan, napilitan ini nga temporaryo nga magpasilong sa tyangge.
Suno kay Lacandula, ang suspect nga naka-green nga raincoat kag helmet nga sakay sa itom nga Yamaha Nmax nga motorsiklo, ang makaduha ka beses pa nga naglabay-labay sa biktima.
Tubtob nga ini ang gintayaan sang armas-luthang kag gintiro sang makapila ka beses sa ulo.
Ang biktima ang nag-agom sang pilas sa ulo kag liog, nga gintunaan sang gilayon sini nga kamatayon.
Gilayon man nga nagpalagyo ang suspect matapos sang krimen.
Narecover sa crime scene ang apat ka fired cartridge cases sang ginapatihan cal.45.
Nahibaluan nga sadto nagadrive man sang tricycle ang biktima, apang sa karun wala sang trabaho.
Padayun man nga gina-imbestigaran ang mahimo may kahimuan sang pagpatay kag kun ano ang motibo sa krimen.
Ginatsekyar man nila kun may-ara sang mga CCTV footages sa mga dalanon nga nakakuha sa suspect, kag nagalaom si Lacandula nga ini ang makabulig sa imbestigasyon.
