Ginapanindugan sang legal counsel sang Manokan Vendors Association nga indi pwede mapahalin ang mga vendors sa Manokan Country sa panindugan nga ang resolution ang ma-emyendahan lamang sa pagpasar sang bag-o nga resolusyon indi sang ordinansa lamang.
Sa interview sang Bombo Radyo Bacolod kay Atty Jomax Ortiz, ang mga vendors sadto ang nagabaligya lamang sa kilid sang dalan, apang sang 1983 ini ang ginhimuan ordinansa kag ginpasar sa Bacolod City Council.
Panindugan sang abogado nga nagserbi na nga cultural heritage sang Bacolod City ang Manokan Country kaangay sa Bacolod Masskara Festival.
Pinaagi sa Manokan Country, nakilala naman worldwide ang Bacolod Chicken Inasal.
Gani hugot ini nga nagapamatok sa plano nga pagsaylo sang mga tenants bangod madula na ang cultural heritage nga madugay na nga ginpundar.
Panugyan sini nga kun luyag patahumon, kuntani rennovation na lamang kaangay sang ginbuhat nga pagbubo sang budget sa Burgos Public Market.
Apang ginakwestyon sini ang legality sang pagpalease sa SM Prime Holdings Inc. nga ginpaagi lamang sa ordinansa.
Suno diri kun ginpaagi sa resolusyon, magalabay pa sa 1st, 2nd, 3rd kag Final Reading sang konseho kag may patigayunon pa nga public hearing.
Dugang pa ni Ortiz nga antes paman ma-aprubahan una na nga nakabatun sang downpayment ang Bacolod City Government gikan sa pribado nga kompanya, antes paman ang resolution sang lease contract.
Ang proyekto ang ginakabig man sang mga vendors nga anti-poor, bangod sa tion nga magsugod na ang operasyon sa bag-o nga Manokan Country, ginalauman naman ang mas mahal nga renta bangod ini ang ginbubuan sang dako nga pondo sang SM Prime Holdings Inc.
