Indi pa matumod sang mga otoridad kun Bantay-Dagat gid man ang suspek sa strafing incident sa fishing boat nga may sakay nga mga fishing crew nga residente sang Victorias City, Negros Occidental kun sa diin isa ang napatay sang tinalikdan nga adlaw.
Sa interview sang Bombo Radyo Bacolod kay Mayor Romeo Villaceran, alkalde sang Madridejos, Cebu, indi bantay dagat sang Local Government Unit ang agpaarak sang luthang sa fishing boat nagikan sa ciudad sang Victorias.
Suno kay Villaceran, ang ila nga Bantay-Dagat ang wala nakapatigayon sang operasyon bangud dako ang balud.
Dugang pa sini nga kun magpatigayon sang operasyon ang Bantay-Dagat may record ini kag kaupod man sa operasyon ang katapo sang Philippine Coast Guard, kapulisan kag Philippine Army.
Ginpahayag man sang alkalde nga magluwas nga dako ang balod, naguba man ang speed boat nga ginagamit sang mga ini sa operasyon.
Sa karun nagapadayon ang imbestigasyon sang mga kapulisan kag katapo sang Philippine Coast Guard agud nga matumod ang may kahimuan sang insidente.
