Gintapos na sang International Criminal Court (ICC) Pre-Trial Chamber I ang confirmation of charges hearing batok kay former President Rodrigo Duterte.
Sa ikaapat nga adlaw, ginpabati sa judges ang closing statements sang tanan nga mga partido nga ginalakipan sang prosekusyon, common legal representatives sang drug war victims, kag defense.
Suno kay Presiding Judge Iulia Motoc, maga-deliberate ang chamber kag magapaguwa sang desisyon sa sulod sang 60 ka adlaw kun ipasaka bala ang kaso ni Duterte para sa trial.
Antes nagtakop ang confirmation hearing kagab-i, nagtindog si senior trial lawyer Julian Nicholls kag nag-apelar sa judges nga indi na pag-ilakip sa records ang closing statement nga gin-deliver sang defense counsel nga si Nicholas Kaufman.
Ang ginapakakas sini sa record amo ang bahin sang statement ni Kaufman nga ginpahayag sini nga ginhambal ni former President Rodrigo Duterte.
Sa closing statement ni Kaufman, ginpangdetalye sini ang pagniwang ni Duterte kag ang iya kasubo samtang yara sa detention.
Ginsaysay man sini sa judges nga naghambal na si Duterte nga nabaton na sini ang iya kapalaran sa ICC.
Pahayag naman ni Nicholls, indi dapat mag-testify si Kaufman para kay Duterte, bangud nagpamalibad na gani ini nga magkadto sa korte agud magtambong sa proceedings.
Nagsabat naman si Kaufman nga indi man testimony ang iya ginhambal, kundi isa lang ka paathag kun ngaa wala nagkadto sa hearing ang former president.
