BACOLOD CITY — Ginpromisa sang bag-o nga acting chief sang Bureau of Fire Protection (BFP) nga malakip ang Negros Island Region sa mga mahatagan sang prayoridad sa idalom sang iya liderato.
Ini ang ginpahayag ni BFP-Negros Island Region Director Fire Senior Supt. Fred Trajeras kasunod sang pagbisita ni Fire Chief Supt. Leonard Bañago agud magtambong sa recognition rites sang 94 ka bag-o nga mga recruits sang BFP sa Panaad Park and Stadium kahapon.
Suno kay Trajeras, klaro ang pahayag ni Bañago nga mahatagan sang pribiliheyo kag mga oportunidad ang NIR sa bahin sang suporta nga iya igatan-ay.
Dugang pa ni Trajeras, bilang isa ka bag-ong tukod nga rehiyon, nagapati ini nga ang NIR magapabilin sa paminsaron sang bag-o nga BFP chief, ilabi na sa pag-hire sang dugang nga personnel kag pag-promote sang mga empleyado sini, pagpatukod sang dugang nga fire stations kag iban pa nga mga kagamitan kag pasilidad.
Nahibaluan nga may daku nga pundo nga ginpain para sa BFP modernization samtang sa tuig 2018, may dos mil ka dugang nga bombero nga iga-hire kag iban sa mga ini ang diri sa NIR.
Samtang, pito na lamang ka mga banwa sa Negros Island Region (NIR) ang nagapabilin nga wala pa sang fire station.
Ini ang ginkumpirmar ni Fire Chief Supt. Leonard Bañago, ang bag-o nga acting chief sang Bureau of Fire Protection (BFP), nga nagkari sa ciudad sang Bacolod agud personal nga magtambong sa recognition ceremony sang 94 ka mga bag-o nga recruits sang BFP sa Panaad Park and Stadium kahapon.
Suno kay Bañago, duha ka banwa sang Negros Occidental kag lima naman sa Negros Oriental ang wala pa sang na-activate nga fire station kag nagasalig sa bulig sang katupad nga banwa ukon ciudad sa tion sang sunog.
Masobra 100 ka mga fire stations ang plano ipatukod para sa mga kabanwahanan kag kaciudaran sa bug-os nga pungsod nga wala pa sang kaugalingon nga talatapan sang BFP.
Ginpasalig naman sini nga malakip ang NIR sa makabenepisyo sa 2.8 bilyones pesos nga pundo para sa modernization program sang BFP kun sa diin ang procurement process ang pagasuguran sini nga tuig 2017 apang sa madason nga tuig pa ang delivery sang mga ini.
Ang amo nga pundo ang gamiton sang Bureau of Fire Protection para sa pagbakal sang dugang nga 112 ka mga firetrucks; 50 ka mga ambulansiya; mga aerial ladder nga para sa Luzon, Visayas kag Mindanao; mga protective gears para sa mga bombero, kag iban pa.
