Sa 13 ka tuig nga pagpamuno ni Kap Remy Roldan bilang Punong Barangay sang Barangay Balaring, Silay City, padayon nga ginapasanyog ang turismo kag pagdumala sang pondo sa barangay.
Sa asod-asod nga tuig, ginpili ang barangay bilang “Best Barangay in Financial Reporting,” bangod sa matinlo kag updated nga accounting records.
Sa interview sang Bombo Radyo Bacolod kay Kap Remy Roldan, Punong Barangay sang Barangay Balaring, nangin posible ang nasambit nga award bangud sa pagbinuligay sang mga personel sa ila nga barangay ilabi na sang mga kagawad kag brgy. treasurer.
Ginpabutyag ni Kap Roldan nga ang transparency amo ang pundasyon sang ila liderato.
Suno kay Kap Roldan, ginapatuman subong nga tuig ang pagbutang sang solar streetlights sa magkatuhay nga bahin sang barangay nga may yara sang pondo nga P300,000 nagikan sa Provincial Government.
Dugang pa diri, isa pa ka dako nga proyekto sa Balaring amo ang P66 million nga Baywlak nga ginpondohan sang national government, nga ginapaabot nga matapos sa bulan sang Marso.
Suno diri, dako ini nga bulig sa ekonomiya sang Balaring, nga ginakilala bilang isa sa mga tourist destination kag “seafood capital” sang Silay City.
Kabahin man sang ila prayoridad ang pagpreserbar sang kultura ilabi na ang mangrove area nga ginadumalahan sang Brgy. Balaring Mangrove Planters Association, kag ini isa ka “hidden treasure” sang barangay nga ginabisitahan sang mga turista.
Pahayag ni Kap Roldan, bilang amay sang barangay, indi malikawan ang mga kabudlayan sa pagdumala, apang padayon siya nga naga-oversee kag nagaresolbar sang mga problema sang mga pumuluyo.
Ginaagda man niya ang pumuluyo sang Balaring nga mag-upod sa Barangay Assembly, agud mahibaluan kun sa diin nagakadto ang budget sang Barangay, suhestyon, kag mga issue sang komunidad.
Nagapasalamat si Kap Roldan sa padayon nga pagsalig sang mga pumuluyo sang Barangay Balaring sa iya liderato, samtang nagahilapit nga matapos ang iya termino, ginapangabay niya ang pumuluyo nga magpili sang maayo kag responsable nga kandidato sa masunod nga piniliay agud mapadayon ang progreso sa Barangay Balaring.
