Malipayon kag energetic ang mga kaparian sa Diocese of Bacolod apisar nga nagpulaw sa pagbantay sa pag-eliher sang bag-o nga Santo Papa.
Nahibaluan nga pasado alas-12:00 na sang kaagahon sang nakita ang puti nga aso sa chimney sang Sistine Chapel nga nagasimbolo nga may napilian na nga Santo Papa.
Ini si Cardinal Robert Francis Prevost, ang first American Pope, nga naggamit sang papal name nga Pope Leo XIV.
Sa interview sang Bombo Radyo Bacolod kay Msgr Ronaldo Quijano, rector sa San Sebastian Cathedral, nagakalipay kag nagapasalamat sa Diyos ang bug-os nga Simbahan Katoliko sa pagbutang sang bag-o nga Santo Papa.
Si Cardinal Robert Francis Prevost, 69 anyos ang natawo sa Chicago, USA apang tatlo ka tuig lamang matapos ma-ordinahan bilang pari sang 1982, siya ang ginpadala bilang Augustinian missionary sa Peru kag Paraguay kun sa diin ini naglawig kag nangin Cardinal.
Si Cardinal Prevost ang nagtindog nga Prefect sa Dicastery for Bishops ukon naga-atipan sa tanan nga mga obispo.
Bilang isa ka Augustinian missionary, si Pope Leo XIV ang may tagipusuon sa mga imol.
Halimbawa sini ang mga Augustinian priest sa Visayas nga nagatukod sang mga simbahan kag mga eskwelahan sa mga lugar nga malayo sa sentro sang ciudad.
Ginpakigbahin man sini nga si Leo the Great ang una nga naggamit sang pangalan ang nagsalig sa pagpangamuyo sang sila ang atakehon sang battalion sang mga suldado nga Mongolian.
Nagluhod ini kag gintubsok ang baston sa duta, samtang nagpundo naman ang leader sang barbarian matapos makita ang mga suldado nga anghel sa likod ni Leo The Great nga sakay sa mga kabayo nga may pakpak.
Samtang si Pope Leo XIII naman ang nakahimo sang pagbag-o sa simbahan sa pag-introduce sang sociopolitical doctrine.
Ginatudlo sini ang kinaadman sang tawo sa pagdumala kag kinamatarong nga madevelop ang kaugalingon.
Si Pope Leo XIV ang malapit man ang tagipusuon sa peripheries ukon sa mga liblib nga lugar.
Pamatuod sini ang una nga mensahe sang Santo Papa nga “Peace be with all of you!” nga amo man ang mensahe ni Hesus sang siya ang nabanhaw.
Subong nga Jubilee of Hope, panawagan ni Fr Quijano nga magpadayun sa pagpangabuhi, mag-upod sa simabahan kag handom sini nga mangibabaw si Kristo sa tagsa ka tagipusuon.
Nagatuo ini nga si Papa Leon ika Katorse ang mangin nawong sang paglaom.
