Liwat na naman nga nagluntad ang moderately explosive eruption sa bulkan Kanlaon alas-7:04 kagab-i.
Sa interview sang Bombo Radyo Bacolod kay Ptolemy Mañego, Science Research Assistant sang Philippine Institute of Volcanology and Seismology (PHIVOLCS) Kanlaon Volcano Observatory, ang nagluntad nga moderately explosive eruption ang kaangay man nga eruption nga natabo sang nakaligad nga Huwebes lamang, Pebrero 19.
Suno diri, nagbuga sang aso nga may kaupod nga abo ang bulkan kun sa diin nagdangat sa 2,500 meters ang kataason sang plume gikan sa crater padulong sa southwest nga dereksyon.
Nagdugay sa sulod sang duha ka minutos ang paglupok sang bulkan kag may yara sang nakit-an nga incandescent ballistics sa palibot sang crater samtang ang pyroclastic density currents ang nag-ilig sa eastern kag southeastern upper slopes sa sulod sang 2 kilometers sa summit crater kag kasunod sini may yara sang nagluntad nga ash emission.
Nagpaandam na ini sang liwat nga pagtupa sang ashfall ilabi na sa banwa sang La Castellana kag ciudad sang La Carlota.
Abiso sini nga likawan ang pagsulod sa 4km permanent danger zone kag magpabilin nga alerto samtang yara sa gihapon sa alert level 2 ang status sang bulkan.
