Padayon pa ang clearing operation sa Barangay Masaling sa banwa sang Cauayan, Negros Occidental kasunod sa nagluntad nga engkwentro sa tunga sang 47th Infantry Battalion kag New People’s Army nga ginapamunoan ni Rex Campus alias “Kalbo” nga amo ang squad leader sang Southwest front kaina alas- 5:25 sang aga.
Sa interview sang Bombo Radyo kay Brig. Gen. Jason Jumawan, commander sang 302nd Infantrty Brigade, indi pa matumod kun pila ang naengkwentro sang militar apang kumpirmado nga yara si Campus.
Suno diri, si Campus ang may kahimoan sang pila ka mga pagpamatay sa mga sibilyan sa bahin sang ciudad sang Sipalay kag Cauayan.
May yara sang nakit-an nga mga dugo sa area kun diin nagluntad ang engkwentro nga naglawig sa sulod sang lima tubtob 10 ka minutos.
Samtang, ginalantaw nga may nasamaran sa grupo sang New People’s Army sa nagluntad nga engkwentro batok sa militar sa Brgy Masaling, Cauayan alas-5:25 kaina sang aga.
Sa interview sang Bombo Radyo Bacolod kay Lt Col Dennis Martinez, Commander sang 47th Infantry Battalion sang Philippine Army, mga remnants sang South West Front sang NPA ang naka-engkwentro sang ila nga tropa.
Suno diri, ang encounter site ang boundary sa kaingod nga Brgy Caliling, nga ginluntaran man sang engkwentro sang tinalikdan.
Dugang pa sini nga ang area ang sakop na sa Area of Responsibility sang 15th Infantry Battalion, apang may mga tion nga sila sa 303rd Infantry Brigade ang nagabaylo-baylo sang lugar nga gina-operate.
Pahayag sini nga samtang nagapatrolya ang 47th IB sa lugar, may pumuluyo nga nagreport tuhoy sa presensya sang armado nga grupo.
Ang bayluhanay sang lupok ang naglawig sang kapin lima ka minutos, apang wala pa ma-account kun pila ang nakasumpong sang militar.
Nagapati si Martinez nga ang na-engkwentro kaina sang aga amo man ang grupo nga na-engkwentro nakaligad sang 15th IB.
Sa karun padayun pa ang pursuit operation sang mga militar sa nagpalagyo nga mga rebelde.
Wala sang napilasan sa tropa sang gobyerno, apang sila ang nakakita sang tinulo sang dugo, nga ginapatihan gikan sa na-igo nga rebelde.
Sa pihak nga bahin, may balay nga medyo malayo naman sa emncounter site, apang sila ang wala man maulamid, kag wala man sang recorded nga nag-evacuate.
