Patay ang empleyado sang Department of Agrarian Reform (DAR) matapos ginluthang samtang sakay sa motorsiklo sa Purok Sandia, Barangay Mambaroto, Sipalay City, Negros Occidental alas-8:35 subong nga aga.
Ang biktima ang ginkilala nga si Andre Marie Tabilog Pajarillo, 57 anyos kag anay Punong Barangay sang Barangay East Proper, Candoni, Negros Occidental.
Sa inisyal nga imbestigasyon, samtang nagadrive sang XR125 nga motorsiklo, hinali nalang nga gintiro ang biktima sang wala pa matumod nga suspetsado.
Ang biktima ang nakaangkon sang duha ka igo sang bala sa iya ulo, samtang narecover man sa crime scene ang duha ka fired cartridges sang Caliber 9mm.
Gindala pa ang biktima sa Sipalay City health office, apang gindeklarar nga dead on arrival.
Padayun naman ang hot pursuit operation sa nakapalagyo nga suspect kag nagpatuman naman sang checkpoint sa nasambitan nga Barangay.
