Magapresentar sang deployment plan ang Bacolod Police Station 1 para sa palaabuton nga Masskara Festival 2024 subong nga hapon.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1 may-ara lamang sila sang gamay nga adjustment sa deployment plan sang Masskara Festival 2023.
Ginapadayaw man sini nga zero major incident ang narecord sa ila area of responsibility nakaligad nga selebrasyon.
Suno diri, sang nakaligad sila ang nagfocus sa Bacolod Public Plaza apang sa karun sila ang maga-extend sa iban nga lugar kaangay sa mga dalan nga madamo sang nagabantay nga pasahero.
Pahayag ni Bonilla nga magadangat sa 163 police personnel ang ila nga kinahanglanon sa highlights sang kapiestahan.
Paathag sini nga sila ang maga-augment halin Oktobre 11 tubtob 27 bangod padayun ang operasyon sang mga festival site sa ila area kun ipaanggid sa iban kaangay sa Lacson Street nga tatlo lamang ka adlaw.
Nagbuhin man ang festival site sa area of responsibility sang Bacolod Police Station 1 bangod wala na sang maplastaran nga festival site sa Manokan Country.
Bangod sini, ang Plaza, Baywalk kag Carnival site sa likod sang Pope John Paul II tower na lamang ang ila nga balantayan.
Magluwas diri, may mga petsa man nga may activities nga patigayunon sa SM City Bacolod, kag sila ang maga-augment man sang police personnel.
Magluwas sa kapulisan, may mga force multiplier man nga ideploy agud magbulig sa paghatag seguridad.
Panawagan ni Bonilla sa mga festival goers nga indi magdala sang mga kontrabando bangod mangin estrikto ang kapulisan sa pagpasulod sa Bacolod Public Plaza.
