Respetuhon ni Negros Occidental Governor Eugenio Jose “Bong” Lacson ang desisyon ni Iloilo Governor Arthur Defensor Jr. natuhoy sa border restriction sang probinsya.
Sa interview sang Bombo Radyo kay Provincial Administrator Atty. Rayfrando Diaz, makahalangawa ang sitwasyon sa Iloilo City kag luyag lang nga protektahan ang nabilin nga bahin sang probinsya.
Nakahanda ang probinsya suno sa iya sa pagbaton sa mga nagikan sa Iloilo ukon Manila kag igapaidalom lang sa RT-PCR test pag-abot sa pantalan.
Apang bangod sa paggutok sang mga quarantine sites, temporaryo nga ginpaiway ang pagbaton sang mga locally stranded individual kag mga repatriated OFWs agud nga mahatagan sang kahigayunan nga maproseso kag mabuhinan ang load sang mga pasilidad.
Ginasiguro naman ni Diaz nga indi mag-issue sang counter executive order si Gov. Lacson sa mga magaabot nga trips nagikan sa Iloilo province.
Ginapangabay naman ni Diaz sa mga pumuluyo nga indi pag-ipamilit ang right to travel bangod wala pa mahibaluan kun sa diin padulong kag kun paano mapunggan ang pandemic.
Ginapangabay man sang provincial administrator nga limitahan nalang ang pagbyahe sa pinakaimportante nga hilikuton kag kun wala naman sang tuman ka importante nga buhaton magpabilin nalang sa probinsya.
