BACOLOD CITY — Indi pa sarang nga matandog ukon mapakaayo sang city government sang Bacolod ang mga closed-circuit television ukon CCTV cameras nga ginbakal sang Puentevella administration apang wala na naga-andar subong.
Nahibaluan nga nagikan sa 15 ka mga CCTV cameras nga nagabalor 14 milyones pesos, apat nalang ang naga-gana.
Suno kay Executive Assistant Joemarie Vargas, may yara sang red flag ang Commission on Audit ukon COA sa amo nga proyekto.
Ang red flag nagakahulugan nga may basehan ang ahensya agud nga ini ang imbestigaran.
Suno kay Vargas, indi basta-basta nga mapa-repair ang mga CCTV cameras.
Sa tion nga ini ang kaayuhon ukon ipalantaw sa technician suno sa executive assistant, kinahanglan nga may yara sang clearance halin sa COA.
Aminado man si Vargas nga indi nila makit-an ang mga papeles sang amo nga proyekto sang nagpungko ang Leonardia administration kun sa diin wala nadugayan kag ini ang naguba.
Suno kay Vargas, nagabili sang 101 mil pesos ang tagsa ka CCTV camera nga ginbakal nagikan sa SHI Tech Unlimited Incorporated apang nagmahal ini bangud sang programming nga ginagamit.
Nahibaluan nga antes matapos ang subong nga tuig, magabakal ang city government sang 32 ka CCTV cameras nga itakod sa nagkalain-lain nga bahin sang ciudad.
