Nagaupod ang Silay City Police Station sa selebrasyon sang Valentine’s Day kag makita na diri ang love is in the air nga ambiance antes ang Lunes.
Pagsulod pa lang sa Silay City Police Station, nagasugata na sa mga in-love ang LOVE BOOTH nga may dako nga heart, hugot lines, bar stool kag lamesa kun sa diin sarang gid makapose agud nga magpapicture.
Sa gwa sang Silay City Police Station, yara naman nahamtang ang dating area nga Instragrammable man ang katahum.
Sa interview sang Bombo Radyo kay Police Lt. Guilmore Cuare, deputy chief for administration sang Silay City Police Station, nagatutok ang hepe nga si Police Lt. Col. Robert Petate sa community relations gani nadihon ang ideya nga maghimo sang mga designs may kaangtanan sa adlaw sang paghigugma.
Suno kay Cuare, luyag ipabutyag sang mga kapulisan sa Silay nga indi lang lunsay pablotter, pagpahimo sang police clearance kag puro reklamo ang masami nga mga rason nga nagakadto ang mga tawo kundi mapakita man ang ginatawag nga love of the community.
Bangud sini, nahuman ang LOVE BOOTH sa desk sang police station nga puno sang makapukaw balatyagon kag makahalam-ot nga mga hugot lines.
Sa Love Spa ukon dating area naman sa gwa sang police station, diri naman makarelax ang magkahagugma ukon magpamilya.
Kag para magmangin special ang pagdate sang valentino kag valentina, ila ginkasugtan nga ang una nga 14 ka tawo nga magabisita sa police station sa Lunes, halin ala-1:00 sa hapon ang makabaton sang free hot choco or coffee, free love chain kag free pitik.
Naglahog pa si Cuare nga ang LOVE BOOTH ang para lamang sa legal couple ukon willing mapublish ang litrato bangud ang makuha nga photos ang igapost sa social media.
Suno sa police official, mangin open sa publiko ang estasyon para sa mga gusto magkadto kag makabatyag sang love vibes.
Sa karon nagaisahanon pa lang ang Silay City Police Station sa bilog nga Negros Occidental ang may amo sini nga tikang angot sa pagselebrar sang Valentine’s Day.
