Nakumpirmar nga ang ikaduha nga napatay sa engkwentro sa Sitio Apitong, Brgy Binalbagan, Negros Occidental amo ang pinakamataas nga lider sang New People’s Army sa bilog nga Negros Island Region.
Sa interview sang Bombo Radyo Bacolod kay Lt Col Ziegred Tayaban, Commanding Officer sang 94th Infantry Battalion, ang ikaduha nga napatay ang ginkilala nga si Reynaldo Elecre alyas Amik, tumandok sang Bohol.
Suno diri, si Amik ang Secretary sang Komiteng Rehiyon Negros, nga anay commanding officer sang regional strike force sang grupo.
Bilang lider sang NPA sa probinsya, nagapati si Tayaban nga ini man ang nagmando sang mga asod-asod nga mga pagpamatay sang rebelde halin sang nakaligad nga tuig.
Si Amik ang dekada naman sa Negros, samtang ang iya asawa nga anay miyembro man sang NPA ang nagpabilin sa Bohol.
Samtang ang una nga napatay nga si Regie Pacheco alyas Dante, residente sang Sitio Bulasot, Brgy. Buenavista, Himamaylan City, ang isa sa mga financial logistics officer sang Central Negros 2.
Sila ang mga nagalibot sa paghatag sang mga extortion letters, kun sa diin nakita sa bag sini ang extortion letters.
Sa impormasyon sang militar, nagadangat sa million pesos ang masami nga ginademand sang mga NPA sa mga tag-iya sang kakampuhan kag contractor sang mga proyekto sang gobyerno depende sa kalaparon sang duta ukon kadakuon sang proyekto.
Suno diri, masami ginasunog sang mga NPA ang mga pananom ukon heavy equipments sang mga indi maghatag sang ila ginapangayo nga kwarta.
