Patay ang 53 anyos nga babayi nga nabunggu-an sang salakyan samtang naga-jogging sa Manville Royale Subdivision, Brgy Pahanocoy, Bacolod City, kaina sang aga.
Sa una nga report tatlo ang nagkalasamaran matapos nga mabungguan sang salakyan samtang nagpapicture matapos ang magjogging.
Ang mga biktima ang ginkilala nga sanday Alyas Shiela, 55 anyos, residente sang Brgy Pahanocoy kag Alyas Sol Regina, 53 anyos, lunsay residente sang Brgy Pahanocoy kag Alyas Karen, 53 anyos, residente sang Brgy Sum-Ag.
Sa interview sang Bombo Radyo Bacolod kay Bacolod Traffic Enforcement Unit Head Police Lt Col. Ramil Sarona, may tatlo ka babayi nga nagajogging sa area apang nag-untat ang mga ini para magpapicture samtang nagatindog sa sakop sang dalan.
May isa ka salakyan nga naggikan sa Araneta St, nga nagleft turn para magsulod sa subdivision, apang wala sini nakita ang tatlo ka babayi nga nagapicture sa dalan.
Suno kay Sarona, nagsuhot sa idalum sang salakyan ang tatlo apang wala man sila nalapakan.
Nagpahayag naman ang driver nga wala sini nakita ang mga babayi bangod nga masilaw ang silak sang adlaw.
Pilason ang tatlo ka mga biktima samtang si Alyas Karen nga nag-agom sang injury sa ulo ang ginbawian sang kabuhi kaina sang udto.
