Nasapwan na lamang sang iya pamilya nga nakalubong na sa ugsaran malapit sa ila gin-imnan sa Andrea Subdivision, Brgy. Zone 2, Cadiz City ang biktima nga ginkilala kay Alexander Enriquez, 57 anyos sang nasambit man nga lugar.
Ginpangita sang iya pamilya ang biktima matapos nga wala ini makapauli kagab-i kag sang ginkadtuan ang balay nga iya gin-imnan, wala na ang kaupod sa inom nga si Leonardo Benitez kag bata sini nga lalaki nga menor de edad nga ginhingalanan lamang nga si Kokik.
Nagpang-usisa ang pamilya kag ila nakit-an nga may tinulo sang dugo sa lugar rason nga ila ini gin usoy kag ila nakita ang kinutkutan nga duta.
Ila ini gin-ukay kag bangud bag-o lang kag manabaw, nagtampad sa ila una ang tiil ni Alexander.
Sang makuha ang bangkay didto nasapwan nga gingutrab ang liog sini kag halos mabulag na ang iya ulo.
Missing na sa lugar ang mag-amay nga ginatudlo responsable sa krimen.
Padayon pa ang imbestigasyon sang Cadiz PNP sa ini nga hitabu.
