Patay ang 32 anyos nga mekaniko sang motorsiklo, matapos ginsulod kag ginluthang sa kwarto sang kaugalingon nga balay sa Zone 4, Barangay Patun-an, sa banwa sang Calatrava kaina alas-12:00 sang kaagahon.
Sa interview sang Bombo Radyo Bacolod kay Negros Occidental Police Provincial Office Spokesperson Police Capt. Wilma Silva, nagatulog ang biktima nga ginkilala nga si Joshua Libre upod sa iya live-in partner nga si Mary Anne Gutas sang matabo ang pagpatay.
Sa imbestigasyon, nabugtawan si Gutas bangod ini ang nakabati sang lupok sang armas luthang tubtob nga nabatian na lamang sini nga naga-ugayong sa kasakit ang iya nga partner.
Didto na lamang sini natalupangdan nga may igo na sang bala sa dughan si Libre.
Wala naman nakita ni Gutas ang suspect.
May narecover naman nga fired cartridge sang cal. 45 pistol sa crime scene.
Sa karun may-ara na sang person of interest nga gina-imbestigaran ang kapulisan.
Suno kay Silva, pagtimalos bangod sa daan nga hiligut-anon ang rasun sa pagpatay sa biktima.
