Dako ang kalipay sang pila sa mga benepisyaryo sang Presidential Assistance for Farmers, Fisherfolks and Families (PAFFF) gikan sa ciudad sang Bacolod kag Probinsya sang Negros Occidental.
Sa interview sang Bombo Radyo Bacolod kay Teresita Ortiz Relota, Vice President sang Paghugpong sang Mangingisda sa Punta Taytay, alas-6:00 sang aga pa lamang sila ang nagpadulong na sa University of Negros Occidental – Recolletos (UNO-R).
Pahayag sini nga sa 32 nila nga miyembro, siyam lamang sila nga nakapasar sa ginpatigayon nga screening sang Department of Social Welfare and Development (DSWD).
Dako ang pasalamat sini kay President Ferdinand ‘Bongbong’ Marcos Jr. nga sila ang nalakip sa listahan sang makabatun sang P10,000 nga cash assistance.
Nakasugtan naman nila nga siyam, nga sila ang magadonar sang kabubut-on nga kantidad nga ila tulungaon sa mga miyembro nga wala nakabatun.
Paathag ni Relota, nga willing gid ini nga magshare bangod indi man niya mabatas nga sila ang may tilig-angon samtang ang iban sa ila miyembro ang wala sang makaon.
Dugang pa sini, plano man niya nga magbakal sang isa ka sako nga bugas nga tungaon sang duha sini ka bata nga kasubong man nga mangingisda apang wala nadala sa makabatun sang ayuda.
Ang mabilin ang gamiton naman sini para sa enrollment sang iya bata kag pangnegosyo.
Sa pihak nga bahin, dako naman ang pagpasalamat sang mga miyembro sang Mainuswagon Dulao Irrigators Association Incorporated sa Barangay Dulao, Bago City, nga sila ang nahatagan sang Mechanical Rice Transplanter – Walk Behind.
Sa interview sang Bombo Radyo Bacolod kay Ereberto Hermodo, presidente sang asosasyon, dako gid nga bulig sa ila nga makina ang magatanom sa baylo nga sila ang magabayad sang tawo nga magatanom.
Pahayag sini nga sa nabatun nga farm machinery, dako ang ila matrabaho sa isa ka adlaw ang isa ka ektarya nga duta, apang dako naman ang gastos kun sila ang magabayad sang 10 ka tawo para magpakyaw ang pagtanom nga magadangat sa P9,000 ang magastos sa bayad, nga dugangan pa sang pakaon.
Paathag ni Hermodo nga madugay na nila nga ginrequest ang Mechanical Rice Transplanter pinaagi sa Rice Competitiveness Enhancement Fund (RCEF), gani dako ang pasalamat sang mga ini nga nahatag nagid man ang ila ginapangayo.
