Nagdangat na sa tatlo ang nagfile sang Certificate of Candidacy agud nga magpadalagan bilang gobernador sa probinsya sang Negros Occidental sa 2025 Midterm elections.
Sa ikaapat nga adlaw sang COC filing sa probinsya, may yara naman sang isa ka indibidwal nga nagikan sa ciudad sang Victorias ang nagfile sang COC sa pagkagobernador.
Madumduman nga una nagfile sang Oktubre 2 sang COC para sa posisyon sang Gobernador amo ang mangunguma nga si Ferdinand Etabag Diego alyas Bongbong Gorilla, 50 anyos kag residente sang Barangay Gatuslao, banwa sang Candoni, Negros Occidental.
Nagsunod diri si Negros Occidental Governor Eugenio Jose “Bong” Lacson nga nagpasa sang COC para sa ikatatlo nga termino sini bilang gobernador.
Kahapon, nagfile man sang COC si Architect Jonathan Paul Octaviano sang Partido Lakas ng Masa.
Kaupod sini nga nagfile si Pastor Erie Mahinay nga nagikan sa San Carlos City bilang kongresista sang first district kag Joel Bantigue sang Talisay City para sa pagka congressman sa third district.
Samtang, isa ka radio broadcaster ang nag file sang iya nga certificate of candidacy sa pag ka board member sa 4th district kahapon.// Siya amo si Angelo Quitco nga nagikan sa San Enrique.
Balantayan sa karun ang pagfile sang COC ni Victorias City Mayor Javi Benitez para sa Congressman sang third district.
Matapos ang blessing kag inauguration sang bag-o nga Silay City Police Station, ginbisitahan ni Police Regional Office 6 Director Jack Wanky ang COMELEC office sang Negros Occidental kag Bacolod City agud nga tsekyaron ang sitwasyon.
Suno kay Wanky, so far so good ang obserbasyon sini bangud in place ang COMELEC personnel kag mga kapulisan nga nasiguro sang seguridad.// Nagpanugyan man ini nga sundon ang mga pagsulundan sang COMELEC ilabi na sa pag-umpisa sang campaign period.
