Ginatinguhaan pa sang kapulisan nga madakpan ang nabilin nga duha ka mga at large nga mga suspetsado nga miyembro sang Epogon robbery group nga imbolbado sa pagsulod sa balay kag pagpatay sa Belgian national nga si Carl Nolens sa Villa Angela Subdivision, Barangay Villamonte ciudad sang Bacolod sang Hunyo 17, 2020.
Madumduman nga napatay ang isa sa mga suspetsado nga si Eddie Epogon, 22-anyos matapos gina-alegar nagbato sa mga otoridad nga nagserbe sang warrant of arrest sa iya sa Sitio Manluy-a, San Jose, Sipalay City nagligad nga Pebrero 20, alas-3:00 sang kaagahon.
Nagpatigayon sang joint operation ang Regional Special Operations Group, Regional Intelligence Division, CIDG Negros Occidental, 604th company sang Regional Mobile Force Battalion 6 kag 15th Infantry Battalion sang Philippine Army batok kay Eddie Epogon, 22-anyos sang amo nga lugar.
Sa interview sang Bombo Radyo kay Police Major Jun Ray Batadlan, hepe sang Bacolod Police Station 4, una naman nga nadakpan sa Cauayan si Francis Epogon.
Suno kay Batadlan, sa karun ginatarget naman sang mga pulis ang duha ka nabilin nga at large nga mga suspetsado nga sanday Ariel Rivera kag Ronnie Epogon.
Suno sa hepe, magluwas kaangtanan sa mga ini sa pagpatay sa Belgian national, may iban pa sila nga mga kaso.
