Preparado na ang Negros occidental Police Provincial Office para sa subong nga holiday season.
Sa interview sang Bombo Radyo Bacolod kay Police Lt. Judesses Catalogo, spokesperson sang NOCPPO, may yara na sila sang gintalana nga igadeploy nga mga kapulisan agud magbantay sang seguridad sang mga deboto nga magsimba sa simbang gabi nga magasugod sa Disyembre 16 sang kaagahon.
Suno kay Catalogo may yara man sang deployment sa mga pantalan kag airports kasubong man sa mga terminals nga magabantay sa pagdagsa sang mga tawo agud masiguro ang seguridad sang mga ini mga nagabiyahe.
Ginpahayag man sini nga antes paman ang pagpatuman sang security plan para sa Oplan Kapaskuhan sang PNP may yara na ang mga ini sang ginpangdeploy mga police personnel sa mga lugar nga ginadugok sang mga tawo kaangay sang business establishment agud magpasiguro sang seguridad sang mga pumuluyo.
Nagpanugyan man ini sa publiko nga mag-aligmat kag indi na magdala sang mga bagay nga makakuha sang atensyon sang mga persona nga may malain nga mga tinutuyo kag makalikaw pa sa mga insidente.
