Padayun ang pagpatigayon sang Renewable Energy Week sang Negros Occidental Provincial Government sa nanarisari nga venue sa ciudad sang Bacolod.
Sa interview sang Bombo Radyo Bacolod kay Breech Pedrajas, core team member sang Secure Negros Campaign, ang aktibidad ang gin-umpisahan sang Mayo 20 kag magatakop sa Mayo 24 kun sa diin ang ila venue sang mga exhibit kag activities amo ang University of St. La Salle (USLS) – Bacolod kag apat ka dalagko nga malls sa ciudad.
Ang programa ang gintambungan sang nanarisari nga renewable energy distributors, tatlo ka mayor nga power distribution utility sa probinsya kasubong man mga financing institutions kaangay sa mga bangko.
Suno kay Pedrajas, sa programa ginapadayaw ang mga bag-o nga teknolohiya may kaangtanan sa tinutuyo nga amat-amat nga transition sa renewable energy.
Paathag sini nga karun ang systema ang diversify mix sang coal fired power kag renewable, apang mas dako ang ginakuha gikan sa fossil fuel.
Target sang programa nga mapatpat, matun-an kag ma-edukar ang pumuluyo sa Negros Energy Development Road Map, nga amo ang magagiya sa transition agud mangin 100 percent renewable energy na ang power supply sang probinya pagdangat sang 2050.
Sa karun naga-endorso man sila sang mga alternatibo nga energy sources nga sarang magamit sang mga pumuluyo ilabi na nga tuman na ka mahal sang electric bill.
Kaangay lamang sa Provincial Capitol Lagoon kun sa diin ang tubig ginagamitan sang solar power powered pump agud nga indi na magamit sang kuryente gikan sa Central Negros Electric Cooperative (CENECO).
Ini ang ginahimo naman sa ciudad sang La Carlota kag Cadiz kun sa diin ang ila nga provincial capitol ang ginasupplyan sang solar energy.
Agud maka-access ang publiko, may scheme man kun sa diin nagasulod ang financial institution, agud makapa-install sang solar panels nga hulugan lamang ang bayad.
