BACOLOD CITY — Ginpasiguro sang National Food Authority nga bastante ang supply sang bugas sa probinsya sang Negros Occidental subong nga lean months ukon tion sang tiggulutom.
Sa interview sang Bombo Radyo kay NFA Negros Occidental Provincial Manager Marianito Bejemino, nahisayran nga nagadangat pa sa 90 mil ka sako ang stock nga bugas sang ahensya sa ila nga mga bodega.
Ini ang locally-produced ukon patubas man mismo sang Negros Occidental kag diri man ginapagaling.
May yara man sang bugas nga halin sa isla sang Panay nga nagasulod sa Negros Occidental.
Bangud sa kadamuon sang commercial rice suno kay Bejemino, nabudlayan ang mga traders kun paano nila paubuson ang stocks bangud malapit na ang harvest season kag may yara sang oversupply.
Subong nga gin-atake sang rice black bugs ang mga hulumayan sa sur nga bahin sang Negros Occidental, nagpadala naman ang NFA sang dugang nga stock sang bugas sa bodega sa Barangay Dancalan sa banwa sang Ilog agud nga makapangaman sa mas malala nga sitwasyon.
May yara man sang bodega sa ciudad sang San Carlos kag ginpadal-an naman ini sang ahensya sang dugang nga stock sang NFA rice.
Samtang, nagpaathag naman ang NFA may kaangtanan sa daan nga mga bugas kag malas-ay ang sabor apang manami gihapon ang itsura.
Sa interview sang Bombo Radyo kay NFA Negros Occidental Provincial Manager Marianito Bejemino, ginpahayag sini nga mabudlay nila madetect ang mixing ukon pagsimpon sang commercial rice sa NFA rice ilabi na subong nga pareho nalang ang itsura sang ila bugas sa local rice ukon ginaproduce sang Negros Occidental.
Apang gin-ako ni Bejemino nga gina-auction sang NFA ang ila mga bugas nga lapaw na isa ka tuig sa bodega.
Ini ang gina-remill ukon ginaproseso sang mga commercial traders gani wala na diri sang puder ang NFA kun ginasamo nila sa commercial rice ukon wala.
Aminado naman ang NFA official nga indi madula ang posibilibad nga yara ang modus sang mga commercial traders nga adulteration ukon lain ang variety sang bugas nga sulod sang sako sangsa pangalan sini sa gwa.
Bangud sini, gina-engganyo ni Bejemino ang mga konsumidores nga magreport sa ila opisina kun makabakal sang kaangay sini nga bugas.
