BACOLOD CITY— Padayon pa ang pagmonitor sang mga kapulisan sa ciudad sang Bacolod kun may nag-abot nga mga evacuees ukon refugees halin sa Marawi City kun sa diin may yara sang presensya sang Maute terror group.
Suno kay Police Supt. Noel Polines, spokesperson sang Bacolod City Police Office, ginhatagan na sang instruction ang tanan nga station commanders nga makig-angot sa mga barangay nga ila nasakupan agud mamonitor kun may mga pangayaw halin sa Mindanao nga nag-abot.
Tinutuyo sini nga mahibaluan kun may mga nag-abot nga refugees ukon mga tawo nga wala sang himata sa Bacolod apang nagpasimpalad diri ukon may mga Maranao nga nagpadulong sa ila nga mga himata sa ciudad.
Sa tion nga may mga evacuees ukon refugees suno sa BCPO spokesperson, magapatigayon sang profiling ang pulis agud madeterminar kun legitimate ang mga ini nga residente sang Marawi City kag wala sang kahilabtanan sa Maute terror group.
Kun may mga refugees naman suno kay Polines, mahibaluan sang local government unit sang Bacolod kun ano ang programa nga igahatag sini agud nga sila ang mabuligan.
Sa pihak nga bahin, wala pa sang evacuees halin sa ciudad sang Marawi nga nag-abot sa Maranao community sa Barangay 31 sa ciudad sang Bacolod humalin sang nagsugod ang operasyon sang tropa sang gobyerno batok sa mga miyembro sang Maute terror group nga nagsabwag sang kalakasan.
Sa pagsikyar sang Bombo Radyo Bacolod sa Maranao community, naistorya sang news team ang anay Imam nga si Masarangan Magundakan nga tumandok sang Marawi City kag may mga himata nga nagpauli diri bangud sa kalakasan.
Apang gin-athag sini nga diri halin sa Bacolod ang iya tiayon kag tatlo ka iban pa nga paryente kag nagbakasyon sa Marawi City.
Ugaling natabuan nga nag-ibwal ang kalakasan sang Maute terror group nga nagtulod kay Presidente Rodrigo Duterte nga magdeklarar sang martial law sa Mindanao gani naglabay sila sa Lanao del Norte agud nga makapalagyo kag makabalik diri sa Bacolod.
Aminado si Magundakan nga nasubuan sila sa nagakatabo sa karun sa ila dutang natawhan kag nagapangamuyo nga kuntani matapos na gilayon ang kinagamo.
