Nakighinun-anon ang grupo sang mga drivers kag operators sang traditional jeepney sa alkalde sang ciudad sang Bacolod.
Ini agud nga magpangayo sang bulig matapos nga magpagwa sang department order ang Land Transportation Office nga sa Agosto 1 pangdakpon na ang mga wala na-consolidate nga mga traditional jeepneys.
Sa interview sang Bombo Radyo kay Rudy Catedral, presidente sang Bacolod Alliance of Commuters, Operators and Drivers (BACOD), nagpangayo sila sang bulig kay Bacolod City Mayor Greg Gasataya nga mahatagan sila sang moratorium matapos nga nagpagwa sang mando si Land Transportation Office Undersecretary Vigor Mendoza nga may dakpanay na nga matabo.
Suno kay Catedral, dugang pa ginpangayuan nila sang bulig nagikan sa alkalde ang ila nga problema nga may kaangtanan sa Local Public Transport Route Plan.
Suno diri, ang 24 ka routa sa ciudad ang gin-award sa onse ka mga kooperatiba kag asosasyon sang mga modernized jeepney sa ciudad.
Bangud sini nga nagapangayo sila sang bulig nagikan sa alkalde nga mahimuan sang City Council sang resolution agud nga mahatagan sang solution ang problema sang transport sector ilabi na sila nga mga unconsolidated.
Suno kay Catedral, kun lantawon kulang ang jeepney units sang traditional jeepneys bisan pa nga nagabiyahe pa ang mga unconsolidated.
Suno diri, dako ang mangin epekto sa tion nga madula ang masobra sa isa ka libo nga units sang traditional jeepney kun ipatuman ang pagpanakop sa Agosto 1.
Ginpasalamatan man ni Catedral ang sabat sang alkalde nga indi pwede maapektuhan ukon madehado ang mga pigado nga driver/operators kasubong man ang impact sini sa mga commuters.
Suno diri agud nga mahatagan sila sang win win solution ang ginapangatubang nga problema, ginrefer sila sa Committee on Transportation sa Sangguniang Panlungsod nga ginapamunuan ni Councilor Atty. Dindo Ramos.
Nagalaom si Catedral nga mahatagan sang nagakaigo nga solusyon ang ila ginapangatubang nga problema sa transportation sector.
