Wala pa gihapon sang person of interest ang Bacolod Police Station 9 sa nagluthang patay sa negosyante sa Purok Masagana, Barangay Sum-ag, Bacolod City sang Martes sang hapon.
Ang biktima ang ginkilala nga si Greg Alvin Gelito, 39 anyos, tumandok sang Barangay Felisa apang nagapuyo na sa karun sa Barangay 35, Bacolod City.
Ini ang ginluthang sang pasulod na kuntani sa iya salakyan gikan sa pagkaon sa talabahan sa nasambitan nga lugar.
Sa interview sang Bombo Radyo Bacolod kay Police Captain Michael Tuburan, officer in charge sang Bacolod Police Station 9 sa karun may mga litrato sila nga ginapakita sa driver ni Gelito kag iban pa nga mga nakawitness sa krimen.
Ini bangod nahibaluan nga antes paman ang pagpangluthang, nakita na ang duha ka mga suspect nga nagatambay sa nasambitan nga kalan-an.
Suno diri, ang mga litrato ang gikan sa mga person of interest sa mga shooting incident nga natabo sa ciudad sang Bacolod, bangod ginalantaw man nila ang posibilidad nga isa lamang ang mga suspect.
Paathag ni Tuburan nga hinali nga may makakilala sa mga suspect kag matumod nga isa sa mga litrato nga ila ginapakita ang nagpatay, ini ang kabigon naman nga suspect.
Sa karun magluwas sa motibo may kaangtanan sa utang, ginalantaw man nga posibilidad sang pagpatay ang relasyon sini sa katrabaho ukon kahisa bilang isa ka contractor.
Nahibaluan nga si Gelito ang ginblotter sa Boracay bangod sa kaso nga esfata kag pagbayolar sa bouncing cheque law samtang ini ang ginapadal-an man sang demand letter sa ila nga balay bangod sa balayran nga masobra P800,000 sa isa ka Hardware Trading sa ciudad sang Bacolod.
