BACOLOD CITY – Nagapati ang hanay sang militar nga indi madamo ang narecruit sang mga New People’s Army agud mangin bag-o nga miyembro sang ila hubon.
Ini ang pahayag ni Major General Jon Aying, division commander sang 3rd Infantry Spearhead Division sang Philippine Army, kadungan sang kumpirmasyon nga ila namonitor ang recruitment sang rebelde nga grupo diri sa probinsya sang Negros Occidental kag bilog nga isla sang Negros.
Suno kay Aying, gamay lamang ang narecruit sang mga NPA bangud nakamarasmas na ang mga pumuluyo nga indi gyera ang sabat sa ila hibubun-ot sa gobyerno.
Aminado si Aying nga sarang nga mapahog sang mga rebelde ang mga pumuluyo apang indi nila mahaylo ang mga ini nga magsulod sa ila hubon.
Sa karun, masobra nalang 200 ang pwersa sang komunista nga grupo diri sa isla sang negros amo gani nga kinahanglan sang mga ini nga magrecruit sang dugang nga miyembro bangud madamo ang nagadesisyon nga magbiya sa ila grupo.
Kampante man ang division commander nga sa pagligad sang napulo ka tuig, magalinong na ang isla sang Negros nagikan sa mga insurhensya.
Suno kay Aying, hayag na ang pagluya sang pwersa sang NPA bangud indi sila makarecruit sa mga barangay bisan diri pa sila nagatinir.
