Aminado ang City Director sang Bacolod City Police Office nga apisar sa asod-asod nga drug buybust operations, wala gihapon nagakadula ang illegal nga droga sa ciudad bangod sa mataas nga demand.
Sa interview sang Bombo Radyo Bacolod kay BCPO Director Police Col. Joeresty Coronica, ang supply sang illegal nga droga nga makumpiskar sa ila mga anti-illegal drug campaign ang wala nagakahulugan nga ginakonsumo lamang sa ciudad.
Ini bangod ang Bacolod City ang nagaserbe nga transhipment point kun sa diin ang illegal nga droga ang mahimo nagalabay lang sa ciudad kag ginadul-ong padulong sa iban nga mga banwa kag ciudad ukon patabok sa iban nga mga probinsya.
Ini man ang rasun kun ngaa bisan milyon-milyon na ang balor sang mga naconfiscate sang tinalikdan kag segi-segi ang ila anti-illegal drugs campaign, may ara pagid sa gihapon sang dugang nga nagakaladakpan.
Paathag ni Coronica nga dako nga problema ang mataas nga demand sang illegal substance, bangod madamo man sang nagarisgo sa pagbaligya.
Indi naman lipod sa ihibalo sang kadam-an nga hapos ang kwarta sa illegal nga transaksyon kag ini ang ginahimo na nga palangabuhian sang iban.
Pahanumdom sang City Director sa mga pumuluyo nga mas maayo nga ireport sa kapulisan kun may illegal nga transaksyon sa palibot bangod sa tion nga may-ara sang bisan isa lamang ka adik sa pamilya, ang tanan ang apektado naman.
Ini man ang nagaresulta sang madamo nga kriminalidad kaangay sang pagpangawat, hold-up, pagpatay kag iban pa.
