BACOLOD CITY — Plantsado na ang preparasyon sang Philippine Army sa Negros Occidental para sa nagahilapit nga paghost sang ciudad sang Bacolod sang Association of Southeast Nations (ASEAN) Meeting sa Marso 21 tubtub 23.
Ang hanay sang militar ang kabahin sang multi-agency task force nga nagadihon sang preparasyon agud nga mahatagan sang seguridad ang delegasyon sa masunod nga semana nga patigayunon sa SMX Convention Center.
Suno kay Col. Elizer Losañes, commander sang 303rd Infantry Brigade sang Philippine Army, all set na ang security preparations para sa amo nga kahiwatan.
Kaina, nagbisita si Losañes sa multi-agency monitoring center kun sa diin kaupod man ang Philippine National Police kag ang Office of the Civil Defense.
Sang nagligad nga adlaw, may nakit-an nga mga fighters jets sa kahawaan sang Negros Occidental kag suno kay Losañes, kabahin ini sang preparasyon para sa ASEAN Meeting kun sa diin ginalantaw sang piloto ang lugar nga pagaluparan sini.
