Luyag mabatian sang Alliance of Concerned Teachers – Western Visayas sa State of the Nation Address (SONA) ni President Ferdinand ‘Bongbong’ Marcos Jr. sa Hulyo 22 nga matalakay ang ginapangayo nga salary upgrading para sa mga manunudlo.
Sa interview sang Bombo Radyo Bacolod kay Maximo Montero, chairman sang ACT-Western Visayas, indi na salary increase ang ila ginapangayo kundi salary upgrading.
Sa karun suno diri ang entry level ang yara lamang sa Salary Grade 11 nga balor P27,000 nga tuman kanubo kun ipaanggid sa mga galastuhan.
Panawagan nila nga mapasaka sa Salary Grade 15 ukon yara sa P50,000 ang sweldo.
Paathag ni Montero nga sa pagtuon sang National Economic and Development Authority (NEDA) kag IBON Foundation, dapat living wage ang ginasweldo sang isa ka pamilya nga may apat ka miyembro.
Pahanumdom sini nga ang pag-ulikid sang gobyerno sa social needs sang mga pumuluyo ang nakapagkit man sa Magna Carta for Teachers, Human Rights kag mismo sa Philippine Constitution.
Suno diri, magluwas sa pagsaka sang bili sang mga balaklon, ang nagakabatun nga sweldo ang may mga government deductions pa kaangay sang Income Tax, GSIS, Pag-Ibig, PhilHealth kag iban pa.
Pinaagi sa pagpasaka sang sweldo sang mga manunudlo, nagapati si Montero nga mas mangin epektibo kag efficient pa ang mga manunudlo sa pagpaalam sang mga kabataan.
Paathag sini nga okay man ang salary increase, apang mas maayo kun salary upgrading bangod kun mapasaka ang entry level, magasaka naman ang salary grade sang mga yara sa mas mataas nga pwesto.
Panawagan sang Alliance of Concerned Teachers – Western Visayas nga mahatag sa education sector ang nagakadapat nga budget.
Sa interview sang Bombo Radyo Bacolod kay Maximo Montero, chairman sang ACT-Western Visayas, halos kada budget hearing, ginapanawagan sang mga ini nga mahatag ang International standard nga pag-alokar sang 6 percent sang National Budget sa education sector.
Apang sa baylo, sa masami 3 percent lamang ang ginahatag sang gobyerno sang Pilipinas kag ang budget ang ginatunga pa sa Department of Education (DepEd), State Universities and Colleges (SUCs) kag Technical Education And Skills Development Authority (TESDA).
Ini man ang rasun nga ginakulang ang budget sang departamento agud magpatuman sang repairs, maintenances kag constructions sang mga school buildings.
Paathag ni Montero nga ang pinakadako nga budget allocations ang nagakadto lamang sa pagbayad sang foreign debt sang pungsod.
Ang kakulangan sa suporta man ang rasun sa pagnubo sang rate sang Pilipinas sa International Assessment./
Panawagan ni Montero nga kun luyag nga maaddress ang educational crisis, dapat nga ihatag man ang nagakaigo nga budget agud masabat sang DepEd ang salabton.
Paathag sini nga luyag nila nga mabatian mismo sa bibig ni President Ferdinand ‘Bongbong’ Marcos Jr. sa iya ikatatlo nga State of the Nation Address (SONA) ang pagtamod sa mga problema sa sektor sang edukasyon.
Suno diri, mas madasig nga magahulag ang mga Departamento sang gobyerno kun ang mando ang gikan sa Presidente.
