Naggasto sila sang dako nga kantidad agud matalupangdan
Nagpahimo sang mga posters kag tarpaulin nga makit-an
Ginapakabit sa mga lugar nga masami makit-an sang katawhan
Indi lang ginatos kundi linibo ang ila gingastuhan.
Sa subong ugaling nga nagsulod na ang tiempo pangampanya
Bisan diin nalang makit-an ang mga nawong nila
Bisan may gintalana nga lugar agud pakabitan sang campaign materials
May mga kandidato gihapon nga indi malikawan nga nagalapas.
Panawagan sang Comelec, isugid sa ila ang may violation
Kuhaan sang litrato kag ipadala sa ila, ini ang kakason
Dugang sa ila trabaho, indi masarangan sang komisyon
Kinahanglan nila sa mga pumuluyo ang kooperasyon.
Paathag sang komisyon, kulang sila sa tinawo
Amo gani nga indi gid masarangan ang trabaho
Kun wala sang bulig sang nagasugid nga mga pumuluyo
Nagahingyo sang pagbantay sa pasaway nga mga kandidato.
Sa sini nga panawagan sang Commission on Election
Sa mga pumuluyo, sa ila ini bala ang bation
Ukon wala man sang mangisog nga ini ang sundon
Bangud nahadlok man nga balikan sa tarpaulin nga kakason.
Mabudlay man abi magmato-mato magpangkakas sang indi imo
Basi magaresulta pa ini sa palaabuton sa ginamo
Amo gani nga indi man naton mabasol ang nagapanalaw nga tawo
Kun wala man sila nagapangisog nga manaway sa kandidato.
