Ginfile na kagab-i ang complaint batok sa suspetsado nga nag-arado sa simbahan gamit ang tricycle kag nagpangguba sang mga santos sa San Isidro Labrador Parish Church sa Don Pedro Yulo, Barangay San Teodoro, Binalbagan, Negros Occidental.
Ang suspetsado ang ginkilala nga si Rolly Semira, 39 anyos, kasado kag residente sa nasambitan nga Barangay.
Sa interview sang Bombo Radyo kay Fr. Leopoldo Cahilig, pari sa San Isidro Labrador Parish Church, kahapon nagamisa ini alas-6:30 sang aga, sang hinali lang nga nagsulod sa simbahan ang suspek sakay sa ginamaneho nga tricycle.
Suno kay Cahilig, nabunggo ang tricycle sini sa mga bangko kag nagtakilid ini.
Nanaog si Semira kag nagpadulong sa altar, apang wala na nahimo pa sang pari nga mapunggan sini si Sumire bangod nga nakasaka na ini sa altar kag ginwahig ang imahen ni Santo Isidro Labrador kag ginlampos pa sini ang imahen ni Hesukristo kasubong man nga ginguba sini ang imahen sang Immaculate Conception kag duha ka rebulto sang anghel.
Suno kay Cahilig, nagawakal si Semira sang linggwahe nga indi sini maintindihan samtang ginapangguba sini ang mga imahen.
Apang, matapos ang tanan, naglakat ini paggwa sang simbahan nga daw kaangay nga wala sang may natabo.
Ini ang ginkordon na lamang sa plaza kag amo na nga nadakpan sang kapulisan.
Pahayag ni Cahilig, nagdangat sa kapin sa P300,000 ang balor sang halit sa mga denekada na nga mga santos, apang luyag lamang nila nga ipa-restore ang mga santos bangod nga mga antique ang mga ini.
Kagab-i ginfile na ang complaint batok kay Semira sa paglapas sini sa Art. 132. Interruption of religious worship.
Nahibaluan man nga si Semira ang anay preso sa Muntinlupa City Jail, samtang temporaryo naman nga isarado ang San Isidro Labrador Parish Church.
