Nangin matalunsay ang una nga adlaw sang implementasyon sang enhanced community quarantie sa probinsya sang Negros Occidental agud nga mapunggan ang paglapta sang coronavirus disease.
Sa paglibot sang Bombo news team, kalabanan nga mga dalanon sa ciudad sang Bacolod kag probinsya sang Negros Occidental ang matawhay bangud halos wala sang nagabyahe nga pribado nga mga salakyan.
![](https://img.bomboradyo.com/bacolod/2020/03/Bacolod-ECQ.jpg)
Nahibaluan nga suspendido ang byahe sang pampubliko nga salakyan kag isa lang ka miyembro sang household nga amo ang gin-isyuhan sang home quarantine pass ang sarang nga makagwa agud nga magbakal sang kinahanglanon.
Suno kay Negros Occidental Police Provincial Office spokesperson Police Major Edison Garcia, wala sang nadakpan nga violator sang ECQ sa una nga adlaw sang implementasyon apang may yara sang 364 ka curfew violators halin sang Marso 17 tubtub 29.
Sa ciudad sang Cadiz, ginpahayag sang hepe nga si Police Major Robert Mansueto nga may yara sang 216 ka curfew violators nga nadakpan.
Ang mga gin-aresto ang gindala sa police station apang sila ang ginhilway man sang natapos na ang curfew period nga nagasugod alas-8:00 sa gab-i tubtub alas-4:00 sang kaagahon.
Samtang nagbulig man ang 303rd Infantry Brigade sang Philippine Army sa implementasyon sang ECQ sa probinsya sang Negros Occidental.
Ang militar ang nagpatigayon sang joint patrol magluwas sa deployment sang mga tropa sa nagkalain-lain nga quarantine control point kag naghatag man sang transport kag manpower sa hauling sang mga relief goods.