Gin-aresto sang National Bureau of Investigation (NBI) – Bacolod ang isa ka peke nga dentista sa Brgy. Alegria, Murcia, Negros Occidental sang Domingo, Abril 6, 2025 paagi sa ginpatigayon nga entrapment operation.
Ang suspek ang ginkilala kay Jessa Mae Mayordo, 38 anyos, kasado kag residente sang nasambit nga lugar.
Sa interview sang Bombo Radyo Bacolod kay NBI Bacolod Executive Officer William De Arca, nagpatigayon ang mga ini sang entrapment operation batok sa peke nga dentista matapos nga may nabaton sila nga reklamo gikan Philippine Dental Association Negros Occidental Chapter bangud man sa reklamo sang nangin pasyente sang suspetsado matapos nga naghubag ang baba sini.
Suno kay De Arca, santo sa iya nga pagpang-usisa ang suspek ang nakahibalo maggabot sang unto, magbrace kag magtakod sang pustiso bangud makapila naman ini ka beses nga nangin assistant sa dental clinic gani nakatuon ini sang proseso kag kun paano gamiton ang mga gamit agud maggabot, magbrace kag magtakod sang pustiso.
Wala man sang lisensya ang suspek apang nagaeskwela ini online kag mas barato ang ginasukot sini bilang bayad sa iya nga pagserbisyo.
Temporaryo ini nga nakahunong sa NBI-Bacolod kag magapangatubang sang kaso sa paglapas sang Republic Act 9484 ukon The Philippine Dental Act of 2007.
