Wala pa nadakpan ang mag-amay nga nagpatay sa manug-ihaw sang karabaw sa Capricorn St., Sharina Heights Subd., Brgy. Taculing, Bacolod City, sang Miyerkules, alas-8:30 sang gab-i.
Ang mga suspetsado amo ang mag-utod nga sanday Winbird Landero, single, ebike driver kag Edwin Landero kag ang ila amay nga si Edbird Landero, 32 anyos, single, wala sang trabaho nga lunsay mga residente sang nasambit nga lugar samtang ang biktima naman ang ginkilala nga si Ernesto Peruelo, 36 anyos kag residente sang Libertad Ext., Brgy. 40, Bacolod City.
Sa interview sang Bombo Radyo kay PCpt Rosalino Pugoy, station commander sang Bacolod Police Station 6, ginkompronta ni Peruelo ang tatlo ka suspek kun ngaa nadalahig ang pangalan sini sa natabo nga kinawatay sang karabaw.
Suno diri, may nagluntad nga pagbinaisay kag amo na nga natabo ang insidente sang pagpamuno.
Gintinguhaan pa ni Peruelo nga malagyo apang ginlaot ini sang mga suspetsado.
Pahayag ni Pugoy, ang tatlo ka suspek amo man ang mga suspek sa natabo nga kinawatay sa banwa sang Salvador Benedicto kun sa diin ginsulod sang mga ini ang karabaw sa van.
