Ginpahayag sang City Director sang Bacolod City Police Office nga may yara sang pagbag-o sa hulag sang kapulisan kasunod sang mando ni Philippine National Police Chief General Nicolas Torre nga 5 minutes response kag 8 hours duty sang personnel.
Sa interview sang Bombo Radyo kay Police Col Joeresty Coronica, bangod luyag sang chief PNP nga gilayon i-iplementar ang 5 minutes response time, nagstrategize gilayon ang BCPO sang pagbag-o sa ila deployment.
Suno diri, madamo na sang available nga resources nga maggamit kaangay sang body worn cameras kag paggamit sang modern technology agud mamonitor ang response sang pulis.
Dugang pa sini, sa karun mas energetic ang mga kapulisan sa pagtrabaho bangod nagnubo na sa 8 hours ang ila duty halin sa 12 hours ukon 24 hours nga trabaho nila sadto.
Suno kay Coronica, ginaseryoso sang kapulisan ang ila trabaho kag sa karun nga 8 hours na lang ang ila duty mas malawig ang ila pagtinir sa area para sa police visibility bangod siya nagapati nga wala sang pulis nga wala nagatulog sa ila 24 hours duty.
Sa pihak nga bahin nagpasalamat si Coronica sa nangin bulig ni Congressman-elect Albee Benitez sa kapulisan kun sa diin nagdangat sa P15.9 million ang nahatag sini nga suporta para sa SWAT van, ICT development, CCTV, drone, ammunition, motorsiklo, kag iban pa para sa BCPO.
