Apisar sa plano sang national transport group nga MANIBELA nga magpetisyon sang P2 fare increase, nagapanindugan ang ila local affiliate nga BACOD nga sila ang indi magpasaka sang plete.
Sa interview sang Bombo Radyo Bacolod kay Bacolod Alliance of Commuters Operation and Drivers (BACOD–Manibela) President Rudy Catedral, nagdialogo ini upod sa ila mga operators, stakeholders, kag driver, kag nakasugtan na sang mga ini nga indi gid magpasaka sang plete, basta may mabatun nga bulig gikan sa National kag Local Government.
Suno diri, nagcommit na ang national government sa paghatag sang fuel subsidies, apang aminado ini nga mahimo madugayan pa makalab-ot sa ila bangod unahon ang sa Luzon.
Samtang nagkumiter naman ang Bacolod City kag Negros Occidental Provincial Government sa paghatag man sang ayuda.
Nagalaom ini nga apisar madugayan ang ayuda sang National Government, una nga makahatag sang bulig ang mga local government units (LGUs).// Gintawgan naman sini si MANIBELA Chairman Mar Valbuena kag ginpahangop ang ila nga panindugan.
Ini bangod indi nila luyag nga pas-anon pa sang commuters ang epekto sang fuel crisis.
Dugang pa sini nga sila ang may mga pamilya man nga nagatrabaho kag mga kabataan na naga-eskwela nga nagaplete.
Suno kay Catedral, ginalikawan nila ang domino effect nga matuga sang pagpasaka sang plete.
Nagapati ini nga kun magsaka ang plete, magademand man ang mga workers sang wage increase, samtang mapektuhan man ang mga negosyo.
SAMTANG...Gin-athag sang grupo sang mga unconsolidated traditional jeepneys nga kun aprubahan ang fare hike petition sang mga National Transport Group, ini ang ma-implementar nationwide.
Sa interview sang Bombo Radyo Bacolod kay Bacolod Alliance of Commuters Operation and Drivers (BACOD–Manibela) President Rudy Catedral, sila ang indi magpasaka sang plete tubtob masarangan.
Apang kun magdangat na sa P100 ang persyo sang Diesel, aminado ini nga sila ang wala naman sang mahimo kundi ang mag-upod sa ginaduso nga pagpasaka sang pletehan.
Aminado man ini nga may mga nagapamatok sa petisyon bangod sa mga alegasyon nga kun manaog na ang presyo sang gatong, ang plete ang indi na magapanaog.
Suno kay Catedral, ang transport sector ang nagpetisyon nga magpasaka sang plete, samtang kun maaprubahan sang Land Transportation Franchising and Regulatory Board, sila ang magapagwa sang fare matrix.
Hinali nga manaog na ang presyo sang gatong sa masarangan nga lebel, nagapati ini nga wala sang driver ukon operator nga magapetisyon nga panubuon ang pletehan.
Apang ang makontra naman nila amo ang mga commuters nga magareklamo.
Suno kay Catedral, responsibilidad na sang LTFRB nga magmonitor sa hulag sang fuel prices.
Indi naman kinahanglan nga maghulat pa ang mga ini kun sin-o ang magapetisyon, kundi sila ang dapat automatic na nga magpagwa sang desisyon kag adjusted fare matrix.
Suno diri, magasunod lamang ang mga drivers sa kun ano ang ipanaog nga fare matrix, kag kun may magbayolar, sila ang mahimo man dakpon sang Land Transportation Office.
SA PIHAK NGA BAHIN….Tuman ka delay kag kulang katama ang P5,000 nga fuel subsidy nga ipanghatag sa mga public utility drivers.
Sa interview sang Bombo Radyo Bacolod kay Romulo Sorillo, 79 anyos, driver kag operator sang consolidated traditional jeepney, apisar nga siya ang nagapanag-iya sang jeep, gamay na lamang ang iya income bangod sa dako nga pagsaka sa presyo sang gatong.
Gani nagapati ini nga mas masakit ang epekto sa mga drivers nga naga-arkila lamang sang jeep.
Suno diri, kuntani nakaligad pa ginhatag ang P5,000 fuel subsidy.
Nagapati ini nga sa uyaya nga hulag sang gobyerno, mahimo nga sa masunod nga bulan pa antes makalab-ot sa mga drivers ang fuel subsidy.
Aminado ini nga bisan paano, makabulig-bulig ang ayuda.
Apang sa dako nga pagsaka sang presyo sang produktong petrolyo, ang P5,000 nga fuel subsidy ang tuman ka gamay, kag indi makaigo bisan sa isa lamang ka semana.
Ginakwestyon man sini ang mga pahayag sang Land Transportation Franchising and Regulatory Board nga ginatun-an pa ang mga petisyon sa pagpasaka sang plete.
Suno diri, masarangan nila nga magdesisyon gilayon, sa baylo hungod nga ginadelatar ang pagpatuman.
Suno diri, bisan maduganga lamang kuntani sang piso ang pletehan, ang dako na nga bulig para sa ila.
Pahayag sini nga sa P11 nga sukot sa plete, may mga nagabayad pa sang P10 nga ginabatun lamang gihapon sang mga drivers.
Gani pangabay sini nga bisan mapasaka na lamang sa P12 ang pletehan agud ma-ibanan man ang pag-antos sang mga drivers.
