Nakapauli na ang mga nag-evacuate kasunod sang engkwentro nga nagluntad sa tunga sang 79th Infantry Battalion sang Philippine Army kag Northern Negros Front sang New People’s Army sa barangay Tamlang, Escalante City, Negros Occidental sang Hunyo 1.
Sa interview sang Bombo Radyo Bacolod kay 1st Lt. Fevie Fajardo, Civil Military Officer sang 79th IB, matapos ang clearing kag retrieval operation kahapon sang hapon, nagdeklarar man ang mga ini nga mahimo na nga magbalik ang tanan nga nag-evacuate.
Suno kay Fajardo, antes ang pagpauli sang mga residente ginhatagan ang mga ini sang foodpacks halin sa Department of Social Welfare and Development (DSWD) kag iban pa nga intervention nga ginhimo sang gobyerno.
Suno diri, narecover sa lugar sang engkwentro ang mga personal nga kagamitan sang mga CTGs kag pila ka mga bala apang wala sang narecover nga firearms.
Samtang ang napatay nga suldado nga si Private First-Class Jhon Rey Brasil, naga-edad sang 29 nga residente sang banwa sang Guimbal ang igahaya kag igalubong sa Barangay Pandanon, Murcia, Negros Occidental.
Nagpanugyan man ini sa tanan nga mga pumuluyo nga kun gin-abisuhan nga mag-evacuate, magbakwit na para sa ila nga safety.
Panawagan sini nga kun may yara sang kakilala nga nagaupod pa sa makawala nga grupo ang iganyuhon na nga magbalik sa gobyerno bangud madamo nga programa ang ginhanda agud sila ang mabuligan samtang kun may yara sang nakita nga presensya sang armado nga grupo sa lugar, indi gid magkahadlok sa pagpangayo sang bulig sa mga otoridad kaangay sang AFP kag mga kapulisan.
