Ginpasiguro ni President Ferdinand “Bongbong” Marcos Jr. nga nagapabilin nga pro-peace ang posisyon sang Pilipinas gani indi sini luyag ma-angot sa anuman nga sistema nga nagapalala sang armed conflict.
Ini ang ginpahayag sang presidente sa posibilidad nga mabatikos ang Pilipinas mangin ang mga pungsod nga katapo sang Association of Southeast Asian Nations (ASEAN) kasunod sang giyera sa tunga sang Russia kag Ukraine.
Suno sa presidente, mas pabor ini sa diplomasya kag malinong nga resolusyon sa mga kinagamo.
Suno diri, maid-id nga ginarepaso sang gobyerno ang mga desisyon may kaangtanan sa trade kag foreign relations agud masiguro nga indi ini mangin kabahin sang mga hilikuton nga mahimo magaduso sang tensyon ukon gyera.
Gin-athag man sang Presidente nga ang negosyo sang Pilipinas sa Russia ang tuman lamang ka gamay nga bahin kun ipaanggid sa kabug-usan nga kita sang amo nga pungsod, gani indi masiling nga nagabulig ang Pilipinas sa pagpondo sang gyera.
Madumduman nga ang European Union, Estados Unidos, kag ang Singapore ang nagpatuman sang mga sanksyon batok sa Russia bangud sa gyera kontra Ukraine.
