Ginkumpirmar ni San Enrique Mayor Jilson Tubillara nga positibo nga may kaso na sang African Swine Fever sa ila banwa.
Sa interview sang Bombo Radyo kay Tubillara, ginpahayag sini nga sa una niya nga obserbasyon sa panit sang mga baboy nagduda na ini nga na-igo sang ASF gani siya na mismo ang nag-initiate nga kuhaan ini sang blood samples kag ginpasa sa nagkalain-lain nga mga laboratories.
Suno diri, sa anum ka mga blood samples, ini ang lunsay nga nagpositibo.
Bangud sini, suno sa Alkalde, magpatigayon sang mga protetctive measures kag ASF protocols lakip na diri ang boundary checkpoints sa nagapasulod kag nagapagwa sang buhi nga baboy ukon karne sang baboy ukon bisan ano nga pork products sa banwa kag ginadumilian man ang pag-ihaw sang baboy.
Suno diri, may executive order na ang banwa angot diri agud masiguro nga indi madugangan ang kaso sang ASF sa banwa kag indi man maglapta sa katupad nga mga lugar.
Pahayag sang Akalde, may budget man para sa assistance sa tanan nga narecord nga may casualty sang mga baboy.
