BACOLOD CITY — Nagpasaka sang kaso si Punong Barangay Noli Villarosa sang Barangay Tangub batok sa pinuno sang Bacolod Traffic Authority Office may kaangtanan sa reklamo sini sa pagpangdakop sa colorum nga mga tricycle.
Santo sa kumpirmasyon ni Villarosa sa Bombo Radyo, kaso nga grave abuse of authority ang iya ginpasaka batok kay Acebuche sa Office of the Ombudsman kag sa National Police Commission.
Nahibaluan nga nagawangal ang punong barangay bangud wala nagapakig-angot ang BTAO head sa iya opisina sa tion nga magpatigayon ini sang operasyon agud nga dakpon ang colorum nga mga tricycle nga nagabyahe sa Barangay Tangub.
Suno sa iya, wala ginarespeto ni Acebuche ang iya posisyon bilang punong barangay kag miyembro sang konseho sang ciudad.
Una na nga ginpahayag sang opisyal nga may pinilian ang BTAO sa pagpangdakop bangud wala sini ginadakop ang mga supporters sang Grupo Progreso nga amo ang partido ni Mayor Evelio ‘Bing’ Leonardia.
Ginakwestyon man sini ang pagsaylo sang asawa ni Acebuche sa city hall sang Bacolod.
Samtang, wala nalingkang si Acebuche sa kaso nga ginpasaka ni Villarosa batok sa iya.
Suno kay Acebuche, indi na siya magpanaog sa lebel ni Villarosa bangud professional siya nga sahi sang tawo.
Ginaabi-abi niya ang panumbungon nga ginpasaka sang punong barangay apang pananglitan nga madismiss ang kaso, magapasaka man si Acebuche sang perjury kag maga-file man sang complaint sa Department of Interior and Local Government.
Magapadala man ini sa sulat sa palasyo sang Malacañang agud ipadangat ang ginahimo sang opisyal sang barangay diri sa Bacolod.
Gin-athag ni Acebuche nga wala siya nahadlok nga magbalik sa Tangub agud magpatigayon liwat sang operasyon.
Suno diri, wala sila nagapakig-angot sa opisina sang punong barangay bangud mas makapreparar pa gid ang mga driver sang colorum nga mga tricycle.
Ginpanginwala ni Acebuche nga wala ginpahibalo ang mga driver antes sila nagpangdakop bangud ginhatagan sila sang tatlo ka bulan agud nga magcomply sang mga dokyumento kag mangin ligal ang ila pagbyahe.
Sa pihak sini, wala naghulag ang mga driver humalin Disyembre tubtub Pebrero 28.
