Nagakahangawa ang Bacolod City Legal Office sa safety sang mga pumuluyo enkaso nga magdamo pagid ang mga vendors sa Bacolod Economic Highway sa Barangay Cabug ilabi na nga matapos na ang dalan kag magabukas na sa mga truck sa Setyembre.
Sa pahayag ni Bacolod City Legal Officer Atty. Romeo Carlos Ting Jr. malapit nalang nga matapos ang dalan kag ini ang iturn-over na sang Department of Public Works and Highways (DPWH) Region 6 sa Bacolod City Government.
Gikan sa Bacolod City ang dalan ang magalapos sa Murcia kag Talisay City.
Pahanumdom sini nga magabukas naman ang milling season sang tubo sa Setyembre gani ang Bacolod Highway ang lauman nga labayan sang mga dalagkuan nga truck nga nagakarga sang tubo.
Bangod sini, ang labi nga ginakahangawa amo ang mga tawo nga nagapunsok sa lugar, kalakip na ang posibilidad nga may hinali nga magatabok samtang may nagalabay nga dalagko nga trucks.
Dugang pa ni Ting nga magapatigayon pa sang road widening ang DPWH agud mahawanan ang dalan para sa milling season.
Ginalantaw sini ang posibilidad nga antes ang turn-over pahalinon sang DPWH 6 ang mga vendors sa Bacolod Economic Highway.
Samtang luyag lamang sang mga vendors sa Bacolod Economic Highway nga sila ang mahatagan sang mapwestuhan.
Sa interview sang Bombo Radyo Bacolod kay Engr. Jeffrey Perez, presidente sang Bag-ong Dalan – Cabug Alliance of Small Entrepreneurs, sila ang nakahanda man nga maghalin sa area inkaso nga pahalinon.
Sa karun sila ang naganegosyar sa DPWH nga mapangitaan sang venue nga hilway kag layo sa peligro.
Ini ang ila paman nga ipalab-ot sa patigayunon nga meeting, kag magahulat kun ano ang mangin desisyon.
