Ginsaysay sang bayaw ni Eumil Francisco, ang amay nga nag-utas sang kaugalingon nga kabuhi matapos ginpanglabo ang iya pamilya sa Purok Ibos, Barangay Tapi, Kabankalan City, Negros Occidental, ang natabo kahapon.
Sa interview sang Bombo Radyo Bacolod kay Arlene Francisco, bayaw sang suspetsado, nabatian sini ang pagsiningitan bangod kapin 10 ka metros lamang ang distansya sang ila balay.
Sa umpisa nahadlok pa ini nga magpalapit bangod sa kahangawa nga pati siya ang malab-an, tubtob nga nagdalagan sa ila ang 13 anyos agud magpangayo sang tabang.
Samtang gina-atake, nagsinggit ang iloy nga sila ang mag gwa bangod patyon ang mga ini sang ila amay, samtang ginlampusan naman sang 13 anyos ang iya amay sang singkaw agud sila ang makapalagyo.
Nasugata naman sang mga ini ang iban pa nga mga biktima kalakip ang iloy nga nagakungkong sang isa ka tuig nga baby.
Suno diri, ginsundan pa sila sang amay, gani sila ang nagpalagyo.
Didto naman nakita sang 13 anyos nga bata ang pagbuno sang ila amay sang kaugalingon sini, lima tubtob napulo ka metros gikan sa ila balay.
Suno diri, ginpahayag sang 13 anyos nga una nga ginlabo sang ila amay ang anom kag siyam ka tuig sini nga utod.
Ang anom ka tuig nga bata ang na-utdan naman sang tatlo ka tudlo, samtang ang isa ka tuig nga baby ang wala matam-an bangod ini ang ginproteksyunan sang ila iloy.
Apisar nga madalom ang mga pilas, estable naman ang kondisyon sang mga biktima.
Aminado si Arlene nga duha ka semana na sini nga natalupangdan nga wala nagatulog kag wala sa kaugalingon ang suspetsado.
